Noiz egiten gara toki batekoak? 1950-60ko hamarkadetan, Estatu espainoletik Azkoitira etorritako etorkinen (eta euren ondorengoen) bertakotzea

Laburpena

Lan honek 1950-60ko hamarkadetan Estatu espainoletik Azkoitira (Gipuzkoa) iritsitako immigranteek eta euren ondorengoek igarotako bertakotze prozesuaz dihardu. Immigrazio hori goranzko industriak bideratu zuen, eta kasu gehienetan, landa-eremutik eremu urbanorako jauzia suposatu zuen. Ondorioz, erronka berriak garatu ziren gizartean: auzo periferikoen sorrera, hizkuntza-kultura ezberdinen arteko talka, eta gizarte berritu baten eraketa. Immigranteek era ezberdinean bizi izan dituzte aldaketa horiek, non espazioa, generoa, hezkuntza/hizkuntza eta belaunaldia aldagai garrantzitsuak bilakatzen diren. Bertakotzea progresiboki gauzatu da, eta identitate ezberdinetan oinarrituz, batez ere, lokalean. Horrek guztiak gizarte berri bat eraiki denaren aztarnak nabarmentzen ditu, eta harrera gizartekoen onarpena ezinbestekoa da.